أيوب بوشتة يودع مكونات الوداد برسالة “مؤثرة”
أعلن الظهير الأيسر أيوب بوشتة رحيله رسميًا عن الوداد الرياضي، منهيا مشواره مع الفريق الأحمر بعد موسمين ونصف.
وجاء ذلك عبر رسالة وداع نشرها على حسابه الرسمي بموقع “إنستغرام”، وجه من خلالها الشكر إلى الجماهير وكل مكونات النادي.
وجاء في تدوينة أيوب بوشتة على حسابه في “إنستغرام”:
“بعد موسمين و نصف قضيتها داخل نادي الوداد الرياضي، وصل الوقت باش نسالي هاد المرحلة من المسار ديالي.
ماشي ساهل تودع بلاصة عشت فيها بزاف ديال اللحظات.. فيها الضحكة، فيها الدموع، فيها الانتصارات، وحتى اللحظات الصعيبة اللي كتقوي الإنسان، والحمد لله، كنخرج منها بتجارب غالية وذكريات غادي تبقى ديما راسخة فقلبي.
كنشكر من القلب الجماهير الودادية على الحب، المساندة، والثقة اللي عطاوتني، وكنطلب منكم السماحة إلا قصرت فشي حاجة، حيث والله ديما حاولت نعطي كل ما عندي ونمثل هاد القميص بأحسن طريقة.
كما كنوجه خالص الشكر للرئيس، والشكر كذلك للإدارة، وأعضاء المكتب، وجميع الأطر، ولكل اللاعبين اللي كان ليا الشرف نلعب معاهم. تعلمت منكم بزاف، وكنتم جزء كبير من هاد الرحلة.
كان ليا الشرف الكبير نحمل قميص نادي الوداد الرياضي، وهاد الشي غادي يبقى من أجمل المحطات فحياتي.
الوداد غادي تبقى ديما جزء من قلبي، وكنتمنا ليها ولجميع مكوناتها كل التوفيق والنجاح فيما هو قادم”.
